最令我心痛的是，不是見到客人穿著不合適的鞋墊，而是穿著一對『扮訂造』的鞋墊。

他攞左隻鞋墊比我睇(如圖)。

我看左一眼：『佢點樣同你整？』

『佢望左我隻腳，扭兩下，再放一張紙入塊板幫我印對腳印出嚟，之後隔2星期就俾左呢對鞋墊我。』

我無言。

我苦苦經營了這檔口仔都已11年，最低限度都知道做生意點都要有一個底線，其中一個就是要『過到自己良心』。唔講什麼商品條例，拿一個現成外殼(啤上字的，要開模具大批量生產才會有的)，貼上面層，仲要客人等兩星期就完成，仲要客人俾訂造鞋墊的價錢，仲要係著得唔舒服，點解可以咁樣？

這是什麼道理？這種欺騙行為，不單只傷害到個客，亦傷害到我們這個行業，令人以為訂造鞋墊就是那麼兒戲的過程，輕易抹殺掉我們一直以來的堅持及努力。

或許有很多人，甚至是醫生或治療師，認為鞋墊只是一個簡單的賺錢工具，只是有個足弓支撐一下，『包裝』一下就可以賺個一兩千圓。如果如此簡單，那我仲點解要繼續堅持訂造鞋墊服務？

別人怎麼做我控制不到，我能做的，就盡力做到更好，幫到人之餘問心無愧。如果你們懷疑自己在其他地方訂造，正在穿著的，不是真正取腳模造的『訂造鞋墊』，可以將你們的鞋墊正反面拍個照，PM或WHATSAPP俾我，我幫你睇。你們真金白銀買的鞋墊，我都衷心希望能物有所值。